ابيات شعر

ابيات شعر : 

بداية القول سلام لقلوب
بتتلاقي و بتعلم و بتداوي

وبتصحصح عقول غابت
مابين هربان وبين حاوي

قالولي تعالى وقول كلمة
مادمت عاشقها وأكيد غاوي

وجيت اتشارك هنا وابارك
لكين دلوقتي .. مش ناوي

أنا مش ح أحكي وأتحاكى
ولا راح أقول هنا حكاوي

وح أحكي ازاي وانا شايف
كلام ما اتقالشي ف غناوي

انا راح ألم أوراقي
وألملم كل ما باقي
اديني قريت .. وفجأة لقيت
بدال الراوي 100 راوي

لو تسمحولي بس أعبّـــر
وإني أوصـف أو أصـــوّر
عشقها ف القلب ساكن
بس ياريت قلبي يقدر

كل حكاويكوا الجميلة
ترجمتها كلمة واحدة
حتى لو كانت قليلة
إنما على روحنا شاهدة
بحبـــك يا مصــــر

بحبــك يا بلـدى يا أصل الوجــود
وحبك فى قلبى ملوهش حدود
يامهد الحضارة
تاريخك منــارة
يعلِّم و يشهد على كل عصر
بحبك يا بلدى .. بحبك يا مــصـــر

كتبتبتك بلادى..فى شهادة ميلادى
سكنتك وساكنك .. أهـلى و ولادى
وراضـى بنصيبـك
وعمرى مااسيبك
سواء كنتى صحرا أو كنتى قصر
بحبــك يا بلدى .. بحبك يا مــصـــر

ده أجمل مافيكِ يا بلدي الامـان
وحضن الأحبه .. في لحظة حنان
وكل أما ببعد
ولا بعرف أعند
ولا تمُـر بيا الليـــالي في يُسْــر
وألاقيك ِ ديماً.. ف قلبي يا مــصـــر

صحيـح جـوة منّى .. مــرارة انكسار
وحاسس بحلمى فى حالة انحسار
لكن بحلم أبنّى
واكبّر فى إبنى
يزّين تاريخــك بنصــرة ونصــر
ويرفعلي رايتك يابلدي يامــصـــر

ده ربي ذكرها ف كتابه الكريم
وقالها رسولنا الحبيب العظيم
خيرها ف جنودها
بيحمــوا حدودهـا
تطول الليالي .. ويفرجها ربك من بعد عسْر
بحبك يابلدى .. وطول عمرى حفضل
أحبـــك يا مصــــر

صفحة باللون الاخضراني
خطهالنا قلب فاني
أصله عاشق روح ولادها
غاوي نيلها الاسمراني
جمّع الصحبة الجميلة
صورت أجمل معاني
تسلمولنا يا أهل بلدي
ومن وراكوا ..

اسكندراني